2022 ж. 07 қарашасында Қостанай қ. Балалар музыка мектебінде «Astana Piano Passion» республикалық жас пианиношылар байқауының іріктеу туры аясында ҚР еңбек сіңірген әртісі, «Астана қаласының Өнер академиясы» ЖШС профессоры Құсайынов Алтай Қарпықұлының шеберлік сыныптары өтті. Іс - шараға сондай - ақ танымал музыканттың әріптестері: ҚР мәдениет саласының үздігі, доцент, «Концертмейстер шеберлігі» кафедрасының меңгерушісі Камелинова Анар Серікқызы, халықаралық байқаулардың лауреаты, PhD докторанты Ахмеров Бекзат Бекболатұлы қатысты.

Залға жиналған фортепиано бөлімінің педагогтары алдында оқытушылар Вера Варюхина, Ольга Судакова, Светлана Ардабьева, Марина Романова сыныптарының оқушылары (Кузнецов Даниил, Жүнісова Диана, Еңбекова Дилназ, Лебедев Артем, Гуцан Ангелина) өнер көрсетті. Түрлі дәуірдегі және стильдегі қазақстандық, орыс және батыс еуропалық композиторлардың шығармалары орындалды.

Профессор түрлі ұқсастықтарды келтіре және әзілмен астарлай отырып асқан жанашырлықпен жас пианиношылардың кем түскен жерлерін дәл көрсете білді, шығармалардың стилистикалық ерекшеліктерін ескере отырып орындаушылық қиындықтардың оңтайлы шешімдерін ұсынды, соның арасында залдағы мұғалімдерге әдістемелік ұсыныстарға түсініктеме беріп отырды.

Елордалық қонақтарға мектеп бойынша экскурсия өткізілді, елге танымал өнер иелері педагогтармен Қазақстанда фортепианоны оқытудың өзекті мәселелерін талқылады, ноталық жаңалықтармен бөлісті. Әңгімелесу барысында бірлескен шығармашылық жобалар жайында идеялар туындады, осындай кездесулерді дәстүрге айналдыру, қостанайлық тәрбиеленушілерді Астана орындаушылық байқауларына қатыстыру бойынша бірлесе жұмыс істеу және Астана мамандарының қатысуымен Қостанайда фестивальдар ұйымдастыру бойынша ұсыныстар айтылды.

Жақсы көңіл күй, жарқын әсерлер, жоспарлардың көптігі мен алуан түрлілігі бұл кездесу тығыз шығармашылық ынтымақтастыққа, жаңа жарқын музыкалық жобаларға жол ашады және нәтижесінде жас музыканттардың орындаушылық шеберлігі мен облыс тұрғындарының мәдениет деңгейінің өсуіне ықпал етеді деген үміт ұялатады.